Претседателот на СОНК Јаким Неделков за НОВА информира дека врз професорите кои во моментов патуваат кон Скопје на закажаниот протест пред Министерството за образование кој треба да се одржи во 12 часот се вршат притисоци од страна на полицијата. Според информациите кои стигаат од теренот, се запирале автобуси пред патарините и се легитимирале професорите.
-Има информации дека има повеќе вакви инциденти. Засега единствена информација која е потврдена е за автобусот од Кавадарци. Уште при поаѓањето полицијата го сопрела, ги извадила сите професори надвор и ги легитимирала еден по еден. Ако ова не е притисок, не знам што, вели Неделков.
Тој додава дека веќе неколку дена членовите на СОНК трпат закани и притисоци да не го поддржат протестот, но работат отишла дотаму што вчера во исто време сите фирми од кои што СОНК ги закупил автобусите за доаѓање на протест во Скопје им биле откажани.
-Вчера сите закупени автобуси беа откажани од фирмите од кои СОНК ги набави услугите. Објаснувањето кое ни го даваа фирмите беше „мораме, така ни наредија“. Зборуваме за приватни фирми, приватни превозници кои, замислете, можат да бидат предмет на притисок и да не ни изнајмуваат автобуси и комбиња, вели Јакимов.