Пратеникот Зеќир Рамчиловиќ добил известување од Комисијата за спречување и заштита од дискриминација, со кое му го прифаќа тврдењето дека во учебниците по историја има содржини кои значат вознемирување врз етничка припадност и религија.
„Правдата може да е бавна, но секогаш излегува на виделина како и вистината. Пред некој ден го добив Мислењето од Комисијата донесено на 17.02.2022, кое исто така е објавено и на нивната веб страница со кое се утврдува вознемирување врз основа на етничка припадност и религија или верско уверување во областа на образованието. Моето Барање со кое треба да се отстранат несоодветни содржини во учебниците по историја се однесуваат на Бошњаците и на Босна и Херцеговина и истите за жал ги има повеќе од кои во мислењето се прифатени 5 забелешки во 5 различни учебници“, вели Рамчиловиќ.
Тој додава дека наставните содржини во учебниците мора да бидат секогаш потпрени на факти, без неточни и неправилни содржини кои создаваат предрасуди и стереотипи. „За жал сеуште во нашите учебници има такви содржини, што ме натера да поднесам претставки до повеќе инстанци, меѓудругите и до Комисијата за спречување и заштита од дискриминација“, додава тој.
Комисијата врз основа на законот има обврска да препорача начин за отстранување на дискриминацијата. И истата од Министерството за образование и наука да бара да постапи и да ја отстрани повредата на правото на еднаквост во рок од 3 месеци и за тоа да ја извести Комисијата. Односно Министерството за образование преку Педагошката служба да ги отстрани несоодветните содржини во учебниците по историја кои се однесуваат на Бошњаците и Босна и Херцеговина.