„Хамас” најави дека нема да го продолжи рокот на 72-часовното примирје со Израел, јави ДПА денеска.
Муса Абу Марзуки, член на раководството на радикалната палестинска група, објавил на профилот на „Фејсбук” дека ова е „втор и последен” прекин на огнот.
Тој ги опиша како „тешки” индиректните преговори во Каиро со Израел за склучување на долгорочно примирје. Според зборовите на Муса, палестинската делегација од преговорите треба да се врати со договор, кој народот на Газа го очекува.
Сегашното примирје започна да тече од полноќ во ноќта спроти 11 август.
Ројтерс објави дека денеска попладне израелските и палестинските преговарачи ќе продолжат со разговорите со египетските посредници.
„Несогласувањата меѓу земјите се големи и нема напредок во преговорите”, рекол за агенциите извор од делегацијата на Израел.
По еден месец воена операција во Газа загинале над 1 900 Палестинци, од кои повеќето цивили, забележуваат агенциите, повикувајќи се на податоци на ОН и палестински извори.
Од војната Израел има 67 жртви, од кои речиси сите се војници со исклучок на тројца.