АТИНА. „Нашето пријателство е крунисано со наградата „Евалд фон Клајст“, чија цел е да им оддаде чест на водечките личности во безбедносната политика кои дадоа исклучителен придонес во меѓународниот мир и управувањето со конфликти”, рече поранешниот претседател на владата Зоран Заев вечерва пред членовите на СИРИЗА во Атина во рамки на партискиот конгрес на кој е гостин на покана на лидерот Алексис Ципрас.
Заев рече и дека тој и поранешниот грчки премиер Ципрас ја делат и „Хесијанската награда за мир” која се доделува на поединци кои имаат извонредна услуга за унапредување на меѓусебното разбирање меѓу народите и мирот, а, ни беше доделена, дополни експремиерот, и „Меѓународната награда за мир на Вестфалија“ која им оддава почит на личности или претставници на држави кои се залагале за европската интеграција и мирот во Европа.
„Но, пред да нѝ бидат доделени овие награди, јас и Алексис, бевме решени да направиме огромен заеднички чекор кој ќе работи за иднината на нашите земји, нашите граѓани, целиот регион и Европа, во име на иднината на пријателството, мирот и стабилноста, за нашите млади генерации”, истакна Заев.
Осврнувајќи се на Украина, тој потенцираше дека воените дејствија што ги презеде Русија создадоа, како што рече, силни ризици, загрижености и стравови.
„Единственото решение е мирот. Итен дијалог наместо насилство. Затоа, целосно ја поддржувам независноста и територијалниот интегритет на Украина и изразувам сочувство до украинското раководство и до семејствата на жртвите. Итно се потребни мир и дипломатско решение кое ќе ги почитува принципите на меѓународното право, заедничките вредности, човековите права и заштитата на основните слободи”, подвлече експремиерот Заев.
Ние, демократскиот свет, како што рече тој, треба да продолжиме да ја зајакнуваме меѓународната соработка и координација за да развиеме нови пристапи за промоција и заштита на демократиите ширум светот.
„Со Алексис работевме за мир и успеавме да го решиме конфликтот кој не враќаше длабоко во историјата. Овој успех има влијание многу подалеку од регионот. Нашиот мировен договор испрати силен сигнал до светот. Не може да постои само закон на најсилните. Во денешниот свет сè уште постои патот на почитта и компромисот, патот на меѓусебното разбирање, патот на мирот и стабилноста”, порача Заев.
„Затоа Алексис и јас избравме да направиме се што можеме за да најдеме решение. Да не се одложува. Кој е украсен со доблести? Оној кој едноставно го пролонгира проблемот или тој што прифаќа да го најде решението? Дојдовме до решение кога сите тврдеа дека е – невозможно”, рече тој.
„Тоа е начинот на кој работат пријателите. Фокусирани на решенија. Градење мостови, а не ѕидови!”, истакна поранешниот претседател на владата, Зоран Заев во својот говор пред членовите и симпатизерите на СИРИЗА.
Во продолжение Заев посочи и дека двете партиите од левицата треба да продолжат уште повеќе да соработуваат.
„Идеите на левицата мора да се промовираат, гласно да се зборуваат и да се артикулираат. И ние треба да преземеме активности според нашите идеи. Имаме добри шанси. Ја оспорувам тезата дека Европа е или ќе биде предводена од екстремната десница. Има многу земји како Грција и Северна Македонија кои го покажаа спротивното. Да останеме заедно. Да направиме повеќе за демократијата и за солидарноста. Ајде да свртиме друга страница”, порача Заев.
Неговиот говор кој беше проследен со бурни аплаузи од членството на СИРИЗА заврши со поздрав на грчки и на македонски јазик при што тој се заблагодари на вниманието и срдечното добредојде. Зоран Заев и поранешниот министер за здравство во неговата влада, Венко Филипче, присуствуваат на дводневниот конгрес на СИРИЗА во Атина, чиј почеток беше вчера попладне.
Денеска како гости на конгресот допатуваа и заменичката претседател на СДСМ Сања Лукаревска и меѓународниот секретар, министерот за европски прашања, Бојан Маричиќ.
Б.Ј.