Општина Центар Жупа денеска бира градоначалник на повторените локални избори.
„Од 7 часот се отворени сите 16 гласачки места и изброниот тек се одвива нормално. Се надеваме дека така ќе мине целиот изборен ден. Во единствениот избирачки список се запишани 7.077 лица со право на глас, што е за 240 гласачи помалку споредено со локалните избори од 17 октомври минатата година“, рече Неџип Илјаз, претседател на Општинската изборна комисија.
Вчера во оваа општина гласаа 52 болни и изнемоштени лица.
Во трка за градоначалничкото место се двајца кандидати – Шаин Шаќир, од партијата Движење за национално единство на Турците и Аријан Ибраим, од Турската демократска партија.
Во оваа печалбарска општина, се повторува гласањето за градоначалник бидејќи излезноста беше 25,77 отсто и не беше обезбеден потребниот цензус на излезност од 33,3 отсто од вкупно, тогаш, запишаните 7.317 гласачи.
Познати бизнисмени во Италија од ова општина, обезбедија бесплатен превоз и од вчера попладне неколку стотина иселеници прситигнаа за да гласаат.