Премиерот Димитар Ковачевски со писмо до поглаварот на Македонската православна црква – Охридска архиепископија г.г. Стефан, и до Синодот, како и со видео обраќање го честиташе големиот празник Велигден.
„Во мое лично име и во името на Владата на Република Северна Македонија, на сите православни верници во нашата земја им го честитам празникот Воскресение Христово – Велигден. Оваа година најголемиот празник во календарот на православните верници го одбележуваме во време кога целиот свет поминува низ глобална економска криза и низ тешките предизвици како што е војната во Украина со сите последици од неа“, вели тој во честитката.
Во овие драматични мигови за нашето современие, Велигденските денови се можност да се свртиме кон повикот да создаваме добри дела и да покажеме солидарност, почитување и разбирање еден кон друг, порача Ковачевски.
Честитки по повод Велигден испратија и претседателот на Собранието Талат Џафери, како и претседателот на Република Северна Македонија, Стево Пендаровски. (Р.Н.)