На 87 годишна возраст по кусо боледување, вчера во Скопје во еден од домовите за згрижување стари лица, почина Ани Рахимовска мајката на балканската музичка ѕвезда Аки Рахимовски. Посмртните останки на Ани Рахимовска ќе бидат погребани претстојнава недела.
Ани Рахимовска поради состојбата со старечката деменција , не знаела за смртта на нејзиниот син, ни изјави Мина Сефер внука на Ани и братучетка на Аки и најблизок член на семејството на Рахимовски со кого се ословувале како сестра и брат, зашто и заедно растеле како деца.
Мина Сефер ни раскажа дека Аки често доаѓал да ја посетува мајка си, особено откако таа по сопствена воља се вратила од САД, каде престојувала кај нејзината ќерка Џули, единствената сестра на Аки. Мина ни соопшти дека Ани, била многу горда на музичката кариера на нејзиниот син и тоа често знаела да го истакнува низ разговор со роднините и пријателите, и особено што целата фамилија имала смисла за музика и природна дарба за тоа.
Во нашето барање за потврда на смртта на Ани Рахимовска, Мина Сефер сподели една информација со јавноста за последните часови од животот на Аки Рахимовски кој згасна на 22 јануари годинава, дотолку повеќе што за овие три месеци, семејството Рахимовски се соочило со три смртни случаи , зашто починала и мајката на Мина, тетката на Аки.
– На 22 јануари утрото околу 8.20 часот ми се јави Аки и ме извести дека ќе дојдел тие денови, зашто потоа ќе одел на рехабилитација во Пула по зафатите на стентирање што ги имаше, па дека ќе отпочнела сезоната на концерти по пандемиската пауза , и дека имал желба да ја види мајка си зашто со оглед на годините и нејзината здравствена состојба не знаел дали ќе може да издржи уште долго време, раскажа Мина за НОВА.
– Ми кажа дека ќе дојде во недела и дека ќе си оди во среда и дека ќе поседи 2-3 дена кусо време, и затоа уште од Загреб ми порача да му направам сарма од лозов лист која ја обожаваше. Јас му ветив и така го финализиравме нашиот разговор преку Вибер. За неполни 4 часа, откако го завршив разговорот со Аки, добив повик од САД од зетот на неговата сестра Џули дека Аки починал. Сеуште сум во шок од тој момент и не можам никако да се опоравам , ни изјави Мина, братучетката на Аки за НОВА, која воедно е последната од семејството Рахимовски во Скопје со која Аки обавил разговор пред да почине. Аки Рахимовски почина на 22 јануари откако му се слошило и бил хоспитализиран но за жал медицинската интервенција завршила безуспешно.
(М.Т.)