Лекар, сопственик на приватна ординација во Македонски Брод година и пол бара да вработи уште еден лекар. Сопственикот на огласот нуди плата од 25 000 денари за докторот кој ќе се вработи во неговата ординација, но досега нема заинтересирани, тврдат за НОВА во Здружението на приватни лекари на Македонија.
Од Здружението велат дека младите лекари не се заинтересирани да се вработат во државата и масовно учат германски јазик за да се вработат во странство. Причината најчесто е во тоа што не се мотивирани финансиски, но и од лошите услови за работа во јавното здравство, реформите кои не им одат во прилог на лекарите и слично.
Само во последните две години од државата си заминале 280 лекари, говорат податоците до кои дошле од Здружението, но точниот број на доктори кои заминале од државата никој не го знае.
-Младите лекари не се мотивирани за да работат во државата. Масовно учат германски јазик и се подготвуваат за работа во странство. Еве, само од Велес во странство заминаа 30 лекари, а голем одлив на доктори има и во другите градови од државата, изјави за НОВА Лилијана Чолакова Дервишова, претседател на Здружението на приватни лекари.
Дервишова вели дека недостасуваат лекари од сите специјалности, како што се очни лекари, уролози, гинеколози. Таа вели дека и лекарите во приватните ординации не се мотивирани за работа бидејќи се што побарале надлежните, сите проекти кои се воведоа со реформите, тие ги прифатиле. Сега, кога тие имаат реални проблеми редно е државата да им помогне.
Лекарите бараат фиксни плати од 40.000 илјади денари за лекар и 20.000 денари за медицинска сестра за матичните лекари, воведување на партиципација, како и да се зголеми надоместокот (капитација) што во моментот изнесува 50 денари по пациент.
-Откако ги изнесовме јавно нашите проблеми со кои се соочуваме, како и барањата им оставивме време од три недели на надлежните да реагираат. Досега никој од надлежните во здравството не реагирал, ниту не повикал на разговор, изјави за НОВА Чолакова Дервишова.
Иако пред еден месец од лекарите најавија протест со три часовно неиздавање на рецепти во септември, сега велат дека Управниот одбор дополнително ќе дискутира за оваа одлука.
Дека ситуацијата станува сериозна говорат и податоците на Синдикатот за здравство, според кои само во последните четири години земјата ја напуштиле околу 450 лекари, од кои 250 се лекари од општа пракса, а 200 специјалисти. Сепак, се смета дека овие бројки се далеку од реалните бидејќи многу од лекарите заминуваат без да ја известат
Лекарската комора, од каде што најчесто земаат потврда дека поседуваат лиценца за работа.
Од 2010 година досега 606 лекари од Лекарската комора побарале потврда за да заминат во странство. Меѓу нив има и лекари кои заминале на обука, на разни специјализации и семинари.
„Лекарската комора им издава документ пред да заминат во странство со кој се потврдува дека имаат лиценца за работа и дека против нив не се води спор пред судот на честа”, велат во комората.
Според резултатите од истражувањето на меѓународниот проект Хелтгрупер спроведено меѓу студенти на Медицинскиот факултет во Скопје во прва година, дури 60,6 отсто од нив „сакаат да се отселат од Македонија” по завршување на студиите, а 54,5 отсто би сакале да работат во приватно здравство. Претходно истражување покажа дека 57 отсто од лекарите имаат намера да заминат во странство. Дел од нив веќе заминаа во Кувајт, Обединети Арапски Емирати и Германија, а дел размислуваат и за заминување во Хрватска, каде по влезот во ЕУ почнува одлив на лекари во Германија, Велика Британија и во скандинавските земји, па многу места ќе останат празни.
Според неофицијални пресметки, државата губи по околу 100.000 евра за еден дипломиран лекар кој ќе замине од системот, а се губи и во квалитетот на здравствена заштита, бидејќи во странство најчесто заминуваат специјалисти.