Околу 20 отсто од гласачите на референдумот за независност на Шкотска ќе гласаат по пошта. Причината е во тоа што речиси 800 илјади од над 4 милиони луѓе живеат во оддалечени или слабо населени места. Поради транспортот на гласачките ливчиња тие се принудени да гласаат порано од официјалната дата на анкетата, која ќе се одржи на 18 септември.
Луѓето се незадоволни заради тоа што се принудени да гласаат порано, бидејќи кампањата продолжува, а промените во ставовите се исклучително динамични.
Последните анкети на јавното мислење покажуваат дека двата табора – за останување во рамките на Велика Британија и за независност имаат речиси еднакви шанси за победа.
Дебатата за независноста на Шкотска се интензивираше и во последниов викенд од кампањата. Во расправијата околу интервенцијата на бизнис лидерите и банките,Лидерот на сепаратистичката Шкотска национална партија (СНП) и актуелен прв министер, Алекс Салмонд изјави дека Шкотите не треба да се „малтретирани” од нафтените компании, супермаркети или Лондон, јавува Би-Би-Си.
Фото: Алекс Салмонд
Изјавата доаѓа откако главниот економист на Дојче банка Дејвид Фолкертс-Ландау изјави дека гласачите и политичарите не успеале да ги сфатат негативните последици од независноста.
Во меѓувреме, анкета на Гардијан покажува дека на рефенрендумот со „Не” за независност на Шкотска би гласале 51 процент, а со „Да” ви гласале 49 отсто од граѓаните.
Кампањата „Да Шкотска“ тврди дека во текот на викендот ќе има повеќе од 35.000 волонтери во 473 штандови кои ќе се обидат да ги убедат луѓето да гласаат за независност.
Учесниците во оваа кампања велат дека 2,6 милиони „Да” летоци ќе бидат испорачани за 48 часа.