Министерот за внатрешни работи Оливер Спасовски денеска во полицискиот центар „Ѓорче Петров“ имаше прилика да се запознае и да предаде во употреба осум специјализирани интервентни возила кои се донација од чешкото МВР во вкупна вредност од 14.200.000 милиони денари.
Шест од нив ќе бидат ставени на располагање на Единицата за брзо распоредување, а останатите две за интервентни операции на САЕ „Тигар“.
Пред присутните на пистата во Полицискиот центар „Ѓорче Петров” беше изведена демонстрација на брзо излегување и влегување, како и тактичко движење, а беа презентирани и техничките карактеристики на возилата.
„Заедно со заменик шефот на Мисијата на Амбасадата на Чешка Република, Лубомир Пшенка, денеска во Полицискиот центар „Ѓорче Петров” присуствував на промоција на осум возила набавени со донацијата од чешкото МВР и од Владата на пријателска Република Чешка, а за потребите на Одделот за специјални полициски операции. Оваа донација на Чешката Република претставува продолжение на процесот што е започнат уште во 2018 година, така што досега, во рамки на донацијата, набавивме 31 ново возило за потребите на Министерството, по принципот на користење на финасиската донација за купување и одржување на техничка опрема во согласност со претходно договорените спецификации“, напиша Спасовски на својот Фејсбук налог.