Град Скопје во понеделник ќе објави јавeн повик за субвенционирање на граѓаните за набавка на високоефикасни инвертер клима уреди за затоплување за 2022 година за кои ќе може да се аплицира онлајн. За таа намена се предвидени 24 милиони денари во Буџетот на Град Скопје за 2022 година.
„На повикот може да аплицираат лица што набавиле инвертер клима уреди почнувајќи од 1 јануари во 2022 година и се жители на Град Скопје (општини Гази Баба, Аеродром, Кисела Вода, Карпош, Чаир, Шуто Оризари, Центар, Ѓорче Петров, Бутел и Сарај) и ги исполнуваат предвидените услови. Повикот ќе биде отворен до 1 ноември во 2022 година или до денот на исцрпување на средствата. Јавниот повик ќе се реализира по редослед на аплицирање, односно по дата и време на аплицирање и по испратена потврда за предадена печка“, информираат од Град Скопје.
Согласно условите од јавниот повик, од Град Скопје потсетуваат дека граѓаните, за да добијат субвенции за инвертери, ќе треба доброволно и без надомест да ги предадат постојните печки на дрва, јаглен, нафта или мазут. Средствата што ќе бидат субвенционирани се во нето износ не поголем од 62.000 денари.
„На Јавниот повик немаат право на учество жителите (домаќинствата) кои имаат станбен објект со приклучок на градско централно греење, без оглед на тоа дали го користат, како и лица кои претходно добиле субвенции за набавка на печки на пелети или инвертери“, се наведува во соопштението на Град Скопје.
Документацијата потребна за онлајн аплицирање ќе биде објавена во понеделник на интернет страната на Град Скопје www.skopje.gov.mk , а аплицирањето ќе се врши преку платформата www.uslugi.skopje.gov.mk , која, исто така, ќе биде активирана во понеделник.