Референдумот во Шкотска и рече «не» на независноста. Но, самата кампања им даде елан на повеќе сепаратистички движења во Европа.
Повеќе сепаратистички региони го чекаа гласањето во Шкотска во надеж дека нивното “да” ќе им ги отвори вратите за да тргнат по истиот пат. Делегации од Каталонија, Баскија, Бретања и Корзика биле испратени во Шкотска за да го набљудуваат гласањето и да им дадат поддршка на приврзаниците на независноста. Во Европа има десетици партии кои се надеваат дека нивните региони ќе станат еден ден независни. Како Фландрија во Белгија, Баварија во Германија, Каталонија и Баскија во Шпанија, во Франција тоа се партии во Корзика и Бретања или Паданија во Италија.
На 11 септември се одржа масовна манифестација во Барселона (Каталонија) чија цел беше да и се даде поддршка на Шкотска но и да се покаже дека овој регион одамна сонува да се раздели во Шпанија. Веќе е закажан референдум или консултација на 9 ноември во Каталонија каде што од гласачите се бара да кажат дали сакаат независност. Но, за разлика од Шкотска каде што постоеше договор со власта во Лондон да се признае резултатот на шкотскиот референдум, шпанскиот Уставен суд го прогласи ноемврискиот референдум за незаконски.
Но желбата на населението да ги следи сепаратистичките партии е варијабилна.
Во Баварија во Германија сепаратистичката партија Бајернпартеи освои само 2.1 отсто гласови на федералните избори во 2013 година.
Но, за разлика од Баварија, во Белгија сепаратизмот на Фландија е далеку попoпуларен. НВА, партијата која го промовира сепаратизмот освои 32 отсто на федералните избори во јуни и со тоа доби најмногу гласови од сите партии во Белгија. Овој резултат и овозможува да формира федерална влада и во моментов се во тек преговори за владата со франкофоните од Валонија. Според аналитичарите, НВА ќе формира федерална влада но се откажува од независноста која во Белгија најверојатно ќе мине низ фаза на конфедерализам.
За многумина причините за сепаратизмот се економски. Како на пример во Италија каде што партијата Северна лига бара независност на Паданија бидејќи смета дека од нејзините каси се префрлаат премногу пари во Рим. Слоганот на партијата тоа отворено го кажува: “Крадецот Рим”.
Белгискиот дневник Ле Суар тврди дека недостигот на европски идентитет го фаворизира регионализмот. За германскиот Ди Велт, станува збор за вирус кој се заканува дека ќе ја зарази цела Европа. Вирус кој и се заканува на европската стабилност.