На Преспа форумот во Охрид е полно со високи гости од цела Европа, претседатели, премиери, министри. Многу луѓе но малку одговори на прашањето дали Албанија и Македонија ќе го добијат долгоочекуваниот старт за преговори. Денеска е клучен ден велат сите кои ги прашавме што се случува.
Имено во текот на денот се очекува француската дипломатија и официјално да го испрати предлог текстот за преговарачката рамка за Македонија до сите земји членки.
Во текстот за кој дипломатите знаат само некои генерални точки велат дека најсензитивните прашања како историјата и јазикот не се вклучени. Сепак како што вели еден висок дипломат за НоваТВ, потребно е да се види интегралниот текст бидејќи ѓаволот е секогаш во деталите.
Во секој случај предлогот на Макрон денеска ќе стигне во престолнините на земјите членки кои потоа првично ќе се изјаснат за него на состанокот на амбасадорите на ЕУ кој ќе се одржи во понеделник.
Во меѓувреме како што дознаваме тука, не е исклучено бугарското собрание веќе утре да има седница на која ќе се расправа за овој предлог на Макрон.
Македонската дипломатија е воздржана во однос на било каков исход и велат дека ова е работа на земјите членки и дека само откако тие ќе се изјаснат, Македонија потоа би требало да го добие и официјално предлогот на преговарачката рамка, по што ќе се изјасни околу него.
Македонските високи функционери присутни овде во Охрид велат дека нивните позиции се познати и јасно искажани а тоа е дека нема никаква можност да се прифати разговор на теми кои ги преминуваат македонските црвени линии како што се историјата и јазикот.
Впечатокот кој може да се добие тука од сите официјални и неофицијални разговори е дека нема многу простор за оптимизам во однос на некој пробив на тврдото бугарско вето но исто така сите велат дека постои некој мал прозорец на можност за пробив и дека се е во рацете на дипломатијата.
Во секој случај прашање на денови е кога ќе бидат познати повеќе детали од оваа голема дипломатска маневра во која се вклучени и САД, како важен меѓународен играч кој смета дека пробивот е неопходен. Или како што вели претседателот Пахор, геополитиката никогаш не била толку присутна во процесот на проширувањето имајќи го предвид предизвикот на руската агресија во Украина, која во случајот игра огромна улога во кроењето на политичките карти на Европа. (Б.Ј.)