Ковачевски, Вучиќ и Рама ќе одат за Брисел

0
By on ВЕСТИ

Премиерите на Македонија и на Албанија, Димитар Ковачевски, односно Еди Рама и претседателот на Србија, Александар Вучиќ ќе одат на Самитот Европската Унија (ЕУ) – Западен Балкан што ќе се одржи утре во Брисел.

Веста синхронизирано ја објавија тројцата лидери.
„Јас, Еди Рама и Александар Вучиќ денес донесовме одлука, уште еднаш да ја потврдиме позицијата дека Северна Македонија, Албанија и Србија имаат европска иднина. Решивме дека треба, пред земјите пријатели, кои се посветени на напредокот на регионот на економски и политички план и кои се залагаат за брзи и одлучни евроинтеграциски процеси, да ги повториме нашите заложби за европскиот пат на целиот Западен Балкан“, објави македонскиот премиер Ковачевски.
„Доколку не се обезбеди прогрес на процесот на евроинтеграции, тоа ќе е сериозен проблем и удар врз кредибилитетот на ЕУ на Балканот. Нашите ставови на оваа тема ќе ги пренесеме заеднички, на самитот на ЕУ за Западен Балкан, во широк форум, во центарот на европската дипломатија“, дополни тој.

Претседателот на Србија Александар Вучиќ објави дека се консултирал со соработниците за одлуката. 

„По деталните и сеопфатни консултации со соработниците и членовите на владите, лидерите на трите земји донесоа одлука за заедничко одење на Самитот, при што се усогласени принципите кои ќе претставуваат основа за разговорите со бројни официјални лица на Европската Унија“, напиша Вучиќ на социјалните мрежи.

Веста ја објави и премиерот на Албанија, Еди Рама.

Присуството на лидерската тројка на состанокот меѓу Западен Балкан и ЕУ, во изминатите денови беше топ тема во регионот откако земјите од регионот изразија незадоволство од политиката на Унијата кон проширувањето, и го доведоа во прашање учеството на самитот. (С.Д.)

Share.