Предлогот на француското претседателство за деблокирање на европскиот пат на Македонија предизвикува разочарување кај бугарските граѓани, покажуваат резултатите од телефонската анкета спроведена од „Галуп интернешанл“.
Според истражувањето, како што јави дописникот на МИА од Софија, 59,5 отсто од анкетираните Бугари сметаат дека со „францускиот предлог“ не се земени во предвид интересите на Бугарија, 25 проценти оцениле дека тој „во доволен степен ги има предвид“ бугарските интереси, додека останатите немаат став.
Кога станува збор за изгласувањето на недоверба на бугарската Влада, 48,1 отсто од испитаниците го одобруваат соборувањето на Кабинетот на Петков, а 50,5 проценти не се согласуваат со таквата одлука.
Податоците од анкетата покажуваат поларизација, но и одредена консолидација на поддржувачите на Владата, до кои се смета дека дошло како резултат на начинот на кој беше соборена Владата на Петков од опозициските партии Граѓани за европски развој на Бугарија (ГЕРБ), Движење за права и слободи (ДПС) и Преродба и од „Има таков народ“, која досега беше дел од владејачката коалиција.
Анкетата покажува и дека мнозинството од испитаниците се надеваат дека новата влада ќе биде избрана од сегашниот состав на бугарското Собрание. Ваков став имаат 57,9 отсто од анкетираните, наспроти 40,6 проценти кои сакаат предвремени парламентарни избори.
На прашањето која партија треба да го добие мандатот за формирање нова Влада, 40,3 отсто сметаат дека тоа повторно треба најбројната политичка формација во бугарскиот Парламент – „Продолжуваме со промената“ на Кирил Петков, додека 18,2 проценти сметаат дека мандатарот треба да го даде ГЕРБ на поранешниот премиер Бојко Борисов. Помалку од 10 отсто од анкетираните сметаат дека бугарскиот претседател Румен Радев треба да го довери мандатот на некоја трета опција.