Сојузот на синдикати на Македонија (ССМ) денеска го продолжи генералниот штрајк со блокада на крстоницата во населбата Автокоманда, на булеварот „Александар Македонски“ со улицата „16 Македонска бригада“. Блокадата траеше од 7 до 10 часот, а беа пропуштани само возила на Итната медицинска помош, на полицијата, на армијата и на противпожарната служба.
Претседателот на ССМ, Дарко Димовсски изјави дека ќе опстојат на барањето за итно линеарно зголемување на платите од 2.806 денари за секој работник.
„Македонскиот работник веќе не може да ги издржи ценовните шокови, енергетската и нафтената криза. Централната и локалната власт да издејствуваат веднаш зголемување на платите“, апелира Димовски.
Тој истакна дека работниците во државава, поради кризата, не смеат да чекаат уште долго за да се остварат нивните барања.
„Сојузот на синдикати на Македонија денеска покажа дека одлучно стои на барања кои во моментот ги смета за неопходни, но и солидарни. Зборувам за 2.806 денари веднаш од 1 јули, како и враќање на регресот, изгубено право во јавниот сектор, од 30 до 100 проценти од просечната плата. Се извинуваме на граѓаните, меѓутоа ова што денеска го правиме е навистина неопходно, бидејќи знаеме дека се најавува нова цена на струјата, ценовните шокови по продавнците се исти, енергетска криза, нафтена“, изјави Димовски.
Упати апел до централната и локалната власт да го прифатат барањето за линеарно солидно зголемување на платите и да „постапат веднаш“.
И натаму останува во сила одлуката за генерален штрајк, вработените во јавниот сектор ќе бидат на своите работни места, но нема да извршуваат работни задачи, освен 10 проценти од вработените кои ќе бидат на располагање за потребите на граѓаните.
ССМ најави дека штрајкот ќе продолжи и со други форми на синдикален притисок, а незадоволството на работниците ќе го изразат и на улица.