Вонреден инспекциски надзор на Државниот санитарен и здравствен инспекторат (ДСЗИ) констатирал недостатоци во работата на Клиниката за Радиологија. Надзорот бил спроведен по претставка до ДСЗИ за неиздаден резултат од извршено снимање.
„Постапувајќи по Законот за здравствена заштита и Законот за права на пациенти, ДСЗИ изврши вонреден инспекциски надзор, при што констатира дека постојат неиздадени резултати на веќе извршени дијагностички процедури. Инспекторатот издаде Решение со кое ја задолжува Клиниката за радиологија да се почитува рокот на важност на издадените упати, резултатите од извршените дијагностички радиолошки испитувања да се издаваат по нивното завршување, согласно медицината базирана на докази и да се почитуваат интерните општи акти од вработените лица“, изјави докторка Ирина Сотирова-Бухова, директорка на Инспекторатот, за НоваТВ.