Заеднички вежбовни активности на специјалните антитерористички единици на Министерствата за внатрешни работи на Македонија и на Бугарија се реализираа денеска во Софија и оценети се како уште една потврда за добрата практична интеракција од областа на внатрешните работи меѓу двете земји.
„Меѓу двете служби се имплементираат форми на прекугранична полициска соработка, содржани во ЕУ Шенген каталогот на препораки и најдобри пракси и во Конвенцијата за полициска соработка во ЈИЕ. Токму, согласно таа Конвенција, во 2009 година се воспостави и функционира Заедничкиот контакт центар за полициска и царинска соработка „Деве Баир – Ѓуешево“, кој во тоа време беше единствен таков центар меѓу земја членка на ЕУ и земја која не е членка на ЕУ. Овој контакт центар е единствен уште по еден основ – тој освен за полициска соработка, служи како контакт центар и за царинска соработка“, потенцирал министерот Спасовски, кој упатил благодарност до колегата домаќин Рашков за топлиот пречек и конструктивните разговори во Софија.
Министерот за внатрешни работи на Бугарија, Бојко Рашков ги оценил како одлични односите во делот на внатрешните работи и безбедноста со Македонија. Тој споделил увереност дека активниот и отворен дијалог за сите теми од заеднички интерес ќе биде поддржан и продлабочен и во иднина.
„Република Бугарија е подготвена да ја развива и продлабочува билатералната соработка и споделувањето на искуства и експерти од областа на внатрешните работи, како држава членка на Европската Унија. Министерот Рашков изрази увереност за уште поактивна и ефективна соработка во сите области, како што се: сузбивање на организираниот криминал, трговијата со луѓе, нелегалната трговија со дрога, тероризмот, криумчарењето мигранти и справувањето со илегалната миграција“, посочил Рашков.