Во Македонија нема недопирливи, а ќе има и одговорност доколку се утврди. Ја поздравувам постапката на Основното јавно Обвинителство за отворање на предмет за овој случај и ве уверувам дека Министерството за здравство целосно стои на располагање, порача министерот за здравство, Беким Сали на попладеневната прес-конференција по синоќешната сторија на ИРЛ насловена како „Нечиста крв“ за третманот на пациенти со хемофилтрација во Клиничката болница „Жан Митрев“.
„Со особено внимание ја следев истражувачката сторија на редакцијата на ИРЛ во врска со приватната установа – Клиничка болница „Жан Митрев“ и состојбите кои се поврзани со лекувањето на ковид пациенти за време на пандемијата на ковид-19 во периодот 2020-2021 година. Информациите кои беа објавени ги примивме со загриженост“, изјави Сали.
Тој информира и за преземените чекори како Министерство за здравство, во текот на денешниот ден, заедно со останатите надлежни инситуции.
„Прво, пратен е допис до Државниот санитарен и здравствен инспекторат веднаш да се направи вонреден инспекциски надзор во Клиничката болница „Жан Митрев“. Побарав информација од Инспекторатот дали во последните три години се спроведени редовни и вонредни надзори и кои се резултатите од истите“, нагласи првиот човек на Здравство.
Агенцијата за лекови МАЛМЕД, како шо истакна, веќе иницираше вонреден инспекциски надзор по однос на постапката на тоа дали е почитувана или не постапката за клиничко испитување на хемофилтрација како метод за лекување на ковид-19.
„Првите сознанија укажуваат дека не е испочитувана, но да оставиме да се утврди фактичката состојба и тој наод ќе го имаме уште во текот на утрешниот ден кога истекува и рокот за изјаснување на Клиничката болница „Жан Митрев“. Третата постапка што повторно ја актуелизираме пред Лекарската комора е спроведување на бараните стручни надзори на лекувањето на пациентите во Клиничката болница „Жан Митрев““, потенцира Сали.
Од извештајот, како што рече, очекува неколку елементи како краен резултат – јасно утврдување на системски недоследности за кои одговорно тврди дека сите кои ќе бидат во негова надлежност како министер ќе ги исправи во најкус можен рок.
С.Д.