Министерството за труд и социјална политика (МТСП) ги повикува работодавачите, негователите и воспитувачите во градинките, вработените во Центрите за социјална работа, во Црвениот крст да ги почитуваат препораките од Министерството за здравство (МЗ) за заштита на здравјето и превенирање на последиците од топлотните бранови кои следуваат, согласно Акцискиот план на Министерство за здравство за превенирање на последиците од топлотни бранови врз здравјето на населението.
Целата територија на нашата држава ќе биде зафатена со температури од портокалова (алертна) фаза во текот на наредните денови, почнувајќи од четврток (21 јули) до недела (24 јули).
Општите мерки кои треба да се почитуваат се следните:
- Ослободување од работните обврски на најранливите групи население, како што се – бремените жени и хронично болни лица.
- Во установите за згрижување на децата (градинки) да не се практикува физичка активност и да не ги изнесуваат децата на отворено во периодот од 11 до 17 часот.
- Единиците на локалната самоуправа, Црвениот крст и Центрите за социјални работи во регионите зафатени со топлотниот бран да пружаат помош на осамени, на стари, на изнемоштени лица и на бездомници.
„Со оглед на фактот дека одредени ризични производни и технолошки процеси може да претставуваат дополнителен ризик по здравјето на изложените работници, се потсетуваат работодавците на бврската за почитување на законските прописи од оваа област“, велат од МТСП.
Истовремено, МТСП апелира на зголемени контроли од страна на надлежниот Државен инспекторат за труд.