Владата на денешната 64-та седница, на предлог на Министерството за здравство (МЗ), ја измени Одлуката во врска со препораките кои се однесуваат на високите температури, па важноста на препораката за ослободување од работа на ранливите групи на граѓани, меѓу кои и бремените жени и лицата над 60 години, се продолжува до 27 јули.
„Според добиените информации од Управата за хидрометеоролошки работи, дека во државава се очекуваат високи температури и во деновите по 24 јули, Владата донесе одлука за измена на заклучокот од претходната седница, којшто се однесуваше на ослободување на одредени категории на лица од работни обврски од 21 до 24 јули 2022 година, со тоа што овој рок е продолжен до 27 јули 2022 година. Препораката за ослободување од работни обврски во периодот до 27 јули се однесува на ранливите групи граѓани, меѓу кои и бремените жени и лицата над 60 години“, информира владината прес-служба.
Како што се посочува во соопштението од оваа одлука, согласно насоките на Народниот правобранител, се изземаат хронично болните лица.