Извршниот директор на организацијата „Репортери без граници“ во германската секција – Кристијан Мир, во интервју за НОВА зборува за притисоците врз медиумите во Македонија, за пресудата од 4 ипол години – затвор за новинарот Томислав Кежаровски кој на 24 месецов го чека одлука од Апелацијата, како и за медиумската состојба како важен момент за членство на земјата во ЕУ
НОВА:Репортери без граници го надгледуваа изборниот процес во Македонија годинава. Кои се вашите заклучоци?
Во суштина не гледаме промени во ситуацијата, се уште е присутен притисокот во медиумите, „Фокус“ е уште еден пример, Томислав Кежаровски е се уште во притвор, се уште нема транспарентност во рекламирањето, не гледам никаква реална промена.
НОВА:Го споменавте Томислав Кежаровски. Како вие како организација можете да помогнете за подобрување на состојбата со новинарите во Македонија?
Нашата главна задача е да го покренеме нивото на свест во јавноста и јавниот притисок за состојбите. Ние сме глобална организација на новинари создадена од новинари за новинарите која се бори за човековите права, за слобода на печатот и наша задача е секогаш да го споменеме името на Томислав Кежаровски во политичките разговори и во кампањи, да помогнеме да не се заборави неговиот случај и да ја покренеме свеста дека Македонија мора да ги почитува европските вредности, ако сака да влезе во Европа.
НОВА: Колку слободата на изразување и медиумската транспарентност е важна за влез на Македонија во Европската Унија?
Би рекол дека слободата на печатот и слободата на изразување се основен предуслов за развојот на другите права, бидејќи луѓето имаат право да бидат информирани за уживање на останатите права. Ако сакам да ја прашам Владата за нејзините надлежности, потребни ми се информации и затоа слободата на информираност и слободата на медиумите е клучна.
НОВА: Кои се вашите препораки за новинарите и медиумите во Македонија?
Новинарите треба да бараат од Владата, нивните права да бидат почитувани и треба да изградат солидарност помеѓу самите нив. Треба да бидат храбри. Има добри новинари во Македонија и сакам да ги охрабрам да продолжат со истражувачко новинарство дури и ако се под закана и да ја сфатат својата работа сериозно. Да ги охрабрам новинарите кои се занимаваат со корупција и организиран криминал, кој се сериозни проблеми во Македонија.