Неколку стотици студенти се собраа пред платото на УКИМ по иницијатива на студентската неформална иницијатива „Студентски пленум“ за да се спротистават на законско решение за екстерно тестирање на студентите.
Од УКИМ студетите ќе се упатата кон Владата по што ќе продолжат со маршот кон Студенскиот дом Кузман Јосифовски Питу и ќе завршат пред зградата на министерството за образование.
Студентите деновиве порачаа дека очекуваат поддршка од своите колеги, но и од професорите за да не се воведе тестирање за студентите.
„Ги повикуваме студентите да истраат во нивните барања и преку својата упорност да манифестираат како се гради автентично студентско движење во Македонија, кое во иднина ќе потегнува и други значајни прашања. Би сакале да упатиме апел и до другите категории на граѓани кои не се студенти да се солидаризираат со студентската борба, бидејќи само здружено се прават промени кои би биле во корист на мнозинството“, соопштија од „Студентски пленум“.
Според најавите од Министерството за образование и наука, испитот треба да се спроведува двапати: првпат кога студентот ќе ја заврши втора година од студиите, со прашања од сите предмети што дотогаш ги полагал, и уште еднаш на крајот од четврта година со прашања од трета и од четврта студиска година. На оние што нема да ги положат испитите, ќе им биде прекинато школувањето.