Снимките кои ги објави „Фокус“ може да се паушални или по партиска нарачка и додека МВР не добие пријава од медиумот нема официјален став од наша страна, изјави за НОВА портпаролот на МВР Иво Котевски.
– Нема никаква пријава од Фокус до МВР, не знам ни за какви снимки точно се работи, може да се паушални тие снимки, а може да се по партиска нарачка, не би можел ништо да кажам се додека не добиеме пријава за тоа. Она што можам да кажам е дека Република Македонија има еден од најсофистицираните системи за издавање лични документи, потенцира Котевски.
Тој предупреди дека доколку Фокус има материјал и сознанија а не ги пријави тогаш се смета за директен соучесник во тоа.
Во меѓувреме од „Фокус“ инсистираат дека видеото и фотографиите се доставени до Јавно обвинителство од каде добиле потврда дека е примена појавата.
Токму од МВР им укажале дека таков е Законот за кривична постапка.
– По консултација со адвокати целиот материјал, видеото и фотографиите се доставени до Јавното обвинителство и оттаму добивме потврда дека е примена пријавата. На едно од прашањата до Котевски, тој одговори дека не го знаеме Законот за кривична постапка. Според новиот Закон за кривична постапка случајот треба да го пријавиме во Јавно обвинителство, дека тоа е институцијата главна за истрагата, а сега вели дека треба да се пријави во МВР. Мислам дека самиот Котевски е контрадикторен, вели Љубиша Арсиќ новинар од „Фокус“.
Денешните реакции во јавноста доаѓаат откако „Фокус“ објави ексклузивен видеоматеријал од приватен имот, каде што се гледа рачна изработка на пасоши.
Повеќе детали од материјалите кои ги објави медиумот, во најновото издание на неделникот „Фокус“ кој е веќе достапен во продажба.