Како поддршка на тутунопроизводителите кои се незадоволни од проценката на тутунот од годинашното производство, земјоделците од струмичко – радовишкиот регион најавија блокада на магистралниот пат Струмица – Радовиш.
„Од името на тутунарите од струмичко-радовишкиот регион, Сојузот на синдикат на земјоделски производители, ги повикуваме сите земјоделци, лозари, градинари, сточари и овоштари, на 27 декември, да излеземе на мирен протест и заедно да ги поддржиме во нивните барања. Протестот ќе се одржи во времетраење од еден час, во периодот од 12,00 до 13,00 часот, и тоа за струмичкиот регион, со блокада на магистралниот пат Струмица – Радовиш, кај „Слобода“ и за радовишкиот крај, со блокада на магистралниот пат Радовиш – Штип, кај клучката кон село Ињево. Воедно ги повикуваме сите, да излезат и да се придружат на протестот, за нашите барања,“ рече Ристо Велков, од Василево, претседател на Сојузот на синдикати на земјоделски производители.
Утрешниот протест на земјоделците нема да го поддржат членовите на Сојузот за тутунски здруженија, заради како што велат можната политичка позадина која ќе го нарушела процесот на откуп.
„Да ги потсетиме тутунарите кога штрајкуваа во 2010 година, откупувачите кои фигурираат на нашиот терен ги повлекоа вагите, што значи дека со штрајк само си нанесуваме штета. И затоа ние сме против ваквите штрајкови. Сојузот на тутунари ги известува сите земјоделци, да не излегуваат на штрајк и да останат дома да си го работат тутунот“, рече Трајче Митров, од здружението на тутунари „Басмак“ од општина Василево.
Инаку веќе неколку денови на откупните пунктови во струмичко – радовишкиот регион, тутунарите реагираа на нереалната проценка и големите одбитоци за влага и песок.