Министерката за култура Бисера Костадиновска-Стојчевска, како член од владината делегација заедно со првиот заменик на претседателот на Владата задолжен за европски прашања, Бојан Маричиќ и со Беким Реџепи, заменик министер за транспорт, положи цвеќе на гробот на Гоце Делчев во цркавата „Св.Спас“.
Историјата е сведок дека Гоце Делчев стапува на политичкиот балкански мегдан токму кога неговиот народ, народот на Македонија непоколебливо носи одлука да ја покаже и употреби својата национална зрелост пред Европа и светот. Тој е еден од најсилните поттикнувачи на вековниот стремеж за македонска држава во која сите ќе уживаат човечки права и социјална правда, напиша министерката Костадиновска-Стојчевска на својата фејсбук страница, по повод 152 годишнината од раѓањето на великанот чие име го сметаме за синоним на народната борба за слобода.
Затоа денес го чествуваме раѓањето на Гоце Делчев (4 февруари 1872, Кукуш), а неговото име го сметаме за синоним на народната борба за слобода.
Како учител и организатор на Македонската револуционерна организација, Делчев го исполнил долгот кон својот народ и во колективната меморија на генерациите до ден денес останува најсветла личност и поради неговата мудрост и поради високите морални карактеристики.
„Непрекинато да работиш за културното издигање и ослободувањето на македонскиот народ“ и да го гледаш „светот како поле за културен натпревар меѓу народите“ се визиите на Гоце Делчев што сите ние ги делиме и ден денеска, напиша Костадиновска-Стојчевска.