Францускиот магазин „Шарли Ебдо“ има долга историја на посветеност кон својата сатира, и секогаш наоѓал начин како да им пркоси на обидите на критичарите и власта да стават завеса на нивната слобода на изразување, пишува британски „Гардијан“.
На сите обиди да се замолчи или заплаши сатиричниот неделник, редакцијата одговарала „попргаво“ и „подрско“.
Во ноември 2011 година, канцелариите на неделникот беа бомбардирани по објавувањето на специјалното издание на кое на насловната беше прикажан пророкот Мухамед со заканувачка порака до читателитe „сто удари со камшик доколку не умрете од смеа“.
Тогашните напади целосно ги уништија канцелариите на магазинот во Париз, веб-сајтот на магазинот беше хакиран, а работниците беа изложени на смртни закани. Но шест дена подоцна, објавено беше ново списание на кое, карикатурист на „Шарли Ебдо“ бакнува Муслиман со голема брада, а пораката која овој пат магазинот ja испрати беше „љубовта е посилна од омразата“.
Една година подоцна, магазинот објави повеќе сатирични фотографии од Мухамед, вклучувајќи го пророкот гол, или пак во инвалидска количка заедно до православен Евреин. Француската влада неколку пати апелираше до уредниците да ги стопираат објавувањата, а потоа затворија неколку амбасади, културни центри и училишта во 20 земји од страв од одмазда.
Пред канцелариите на магазинот беше поставена и полиција за да ја заштити редакцијата од директни напади. Министерот за надворешни работи Лорен Фабиус јавно го критикуваше магазинот прашувајќи „Дали е разумно и интелигентно да се додава масло во огнот?“.
Но главниот и одговорен уредник Жерар Биар ги отфрли критиките и рече дека тие се весник кој ги почитува француските закони.
– Доколку во Кабул или Ријад има различни закони, ние нема да се измачуваме како би ги испочитувале, изјави уредникот Биар.
Нападите на магазинот за описот на Мухамед и доследната „пргавост“ го стави во фокусот ставот на неделникот за Исламот.
Во 1970 година, предходникот на „Шарли Ебдо“ (Хара-Кири Ебдо) беше забранет откако сатирично ја покриваше смртта на екс-претседателот Шарл де Гол. Како би ја избегнале забраната, уредниците му го дадоа сегашното име на магазинот, земајќи го во предвид месечниот сатиричен стрип „Шарли Менсуел“ (именуван по Чарли Браун) и таткото на Петтата француска република Шарл де Гол.
Списанието прекина со издавање во 1981 година поради слаба продажба, но повторно беше лансирано во 1992 година во неговата сегашна форма.