Министерството за труд и социјална политика реагира на нашиот текст под наслов „Дали и пензионерите ќе плаќаат дел од придонесите за хонорарите?“ и смета дека текстот е тенденциозен и невистинит.
„НОВА“ денеска објави дека втор ден кабинетите на министрите за финансии и за труд и социјала, Зоран Ставрески и Диме Спасов се оглушуваат на прашањето на „НОВА“ дали е вистина дека од 1. јануари 2015 пензионерите, сепак, ќе плаќаат придонес за здравствено осигурување од 7,3 проценти во случај ако примат хонорар.
Ние се повикавме на ставот на поранешниот министер за труд и социјала Самка Ибраимовски кој напиша дека пензионерите ќе бидат ослободени од придонесот за пензиско, меѓутоа ќе го плаќаат придонесот за здравствено осигурување од 7,3 отсто.
Од министерството велат:
„Одредбата од член 10 став (1) точка 8 наведена во Вашиот натпис се однесува на обврската за плаќање на придонес за здравствено осигурување за корисник на пензија врз основа на исплатената пензија. Со членот 13 сстав (1) точка 7 од истиот закон, се уредува дека уплатата на придонесот за здравствено осигуурвање за корисник на пензија го врши Фондот на пензиското и инвалидското осигурување на Македонија и тоа при секоја исплата на пензија.
Согласно одредбите од Законот за придонеси од задолжително социјално осигурување јасно и прецизно е наведено дека исплатата на придонесот за здравствено осигурување за секој корисник на пензија при исплатата на пензијата го врши Фондот на ПИОМ, а корисниците на пензија се исклучени од обврската за плаќање на социјални придонеси доколку остваруваат приходи врз основа на договор за дело и/или авторски договор или друг договор.Со оваа шпекулација, порталот НОВА ТВ шири апсолутна невистина и заблуда кај граѓаните особено имајќи во предвид дека законските одредби се јасни и прецизни“.
Јас како автор на текстот ги отфрлам квалификациите на министерството дека текстот е тенденциозен и невистинит.
Имено, во текот на понеделникот и денеска дури 12 пати (и со зборови ДВАНАЕСЕТ ПАТИ) се обидов да го исконтактирам портпаролот на Министерството за труд и социјала, Марјан Гиовски и да побарам мислење на овој ресор во врска со забелешките на ексминистерот Ибраимоски. Меѓутоа господинот едноставно не се јавуваше, ниту пак праќаше одговор на моето прашање кое го доби на имејл!
Министерството се одважи за реакција дури откако го објавивме текстот, а и имаше време тоа да го стори цели два работи дена.
Во текстот, „НОВА“ ништо не констатира за законот туку едноставно бара одговор на едно едноставно прашање на кое министерството одговори дури откако го објавивме текстот.