Министерот за транспорт и врски Миле Јанакиески денеска попладнево на прес конференција во просториите на министерството објави дека го раскинува договорот за закуп со фирмата „Лудвиг Фајфер“, а најави и тужба за портпаролот на Социјалдемократскиот сојуз (СДСМ) Петре Шилегов. Реакциите на министерот доаѓаат по објавените информации дека компанијата која го добила тендерот за проектот „Реконструкција и продолжување на канализациона мрежа во Прилеп“ раководен од Министерствоот за финансии закупила деловен простор за потребите на проектот во куќата на Јанакиески во Прилеп.
– Ги повикувам јавното обвинителство, Антикорупциската комисија и сите надлежни органи доколку постои макар и најмал сомнеж за корупција и конфликт на интереси да постапат согласно своите надлежности. Нема да му дозволам на Шилегов со навреди да го валка моето име, рече министерот на прес конференцијата додавајќи дека тој во Прилеп не живее веќе 10 години, а куќата која што ја стекнал како наследство ја издава од 2005 година за што уредно ја известил и Антикорупциската комисија.
На прашањето на НОВА како ги запознал закупците кои одлучиле да ја изнајмуваат токму неговата куќа Јанакиески рече дека имал објавено оглас на влезната врата од куќата.
– Имав објавено едноставно бели листови, А4 формат на влезната врата од куќата во Прилеп што ја издавам, одговори министерот за транспорт и врски.
Целата прес конференција погледнете ја во ова видео.