Здружението за духовно обединување на Сетинци, Попадинци и Крушодари од Лерин во Македонија повторно доби финансиски средства од Буџетот на државата наменети за финансирање на програмските активности. Владата на 24.12.2014 година одлучила и на ова Здружение да му даде дел од колачот од околу 200 000 евра кој го делат 40 здруженија и фондации од државата.
Здружението за духовно обединување на Сетинци, Попадинци и Крушодари на македонската јавност и е познато по изградбата на петте споменици во централното градско подрачје кои предизвикаа многу контарвезии во јавноста, особено споменикот на Андон Косето, кој се наоѓа пред Врховен суд. .
Четири од петте споменици, уште во 2012 година биле дадени како донација на општина Центар, но по доаѓањето на Жерновски за градоначалник, зелено светло з а нивно поставување им дадоа советниците на Град Скопје. Во моментот во тек е поставувањето на шестиот споменик на Ѓорѓи Сугаре пред Универзитот „Кирил и Методиј“, на почеток на булеварот Крсте Петков Мисирков.
Здружението за духовно обединување на Сетинци, Попадинци и Крушоради кое се јавува како донатор на спомениците е регистрирано на домашната адреса на Ташко Јованов во скопската населба Карпош 4. НОВА го контактираше Ташко Јованов за да одговори дали и овие средства ќе бидат наменети за изградба на нови споменици и дали Здружението планира да гради уште споменици во Скопје.
„Спомениците се направени од донации во странство и од фирми. Имаме донации од околу 200 фирми. Овие пари што ги добивме од Владата се наменети за друго, но што е тоа, јас не можам да знам бидејќи не ја знам програмата на памет. Дали ќе се градат други споменици треба да одлучи Собранието на нашето Здружение кое го застапува егејското прашање“, изјави за НОВА, Ташко Јованов.
Тој не сакаше да одговори колку чинат спомениците, бидејќи како што рече , не знае со кого вистински разговара на телефон.
„Дури и ова е многу што ви одговорив“, рече Јованов.
Ова не е првпат Владата да одвојува финасиски средства за ова Здружение. Четири години по ред на сметката од ова Здружение легнувале по 5000 евра буџетски пари наменети развивање на нивните програмските активности. За што ќе бидат употребени овие средства и кои се всушност нивните активности, останува енигма.
Петте споменици кои се донација за градот од ова Здружение, никнаа преку ноќ на почетокот на септември. Спомен-обележја добија Никола Русински и Пере Тошев и тие се наоѓаат пред Универзитетската библиотека, пред Судска палата е поставен споменикот на Андон Ќосето, на генерал Михајло Апостолски на клучката кај Континентал, а на Ѓорѓи Сугарев е во фаза на поставување, пред Универзитетскиот комплекс. Ниту градоначалникот Коце Трајановски, ниту Владата не одговорија кое е мистериозното Здружение и какво е потеклото на парите со кои донира споменици на град Скопје.
