Попладнево пред Владата на РМ се одржа протест против именувањето на Талат Џафери за министер за одбрана, во кој дел од учесниците предизвикале инциденти, фрлајќи камења и тврди предмети кон полициските службеници кои го обезбедувале протестот, информира МВР.
4 граѓани се повредени, 6 полицајци се пожалиле на повреди здобиени во инцидентот, неколку возила на полицијата се оштетени, а каменувани се и автомобили и автобуси.
По интервенцијата на полицијата пред Владата, напаѓачите биле потиснати, но дел од нив се упатиле кон Плоштадот Македонија и Железничката станица, при што оштетиле неколку приватни возила како и автобуси.
Досега неколку лица се приведени а се трага по останатите, соопштува МВР за НОВА.