И по 75 години од усвојувањето на најпознатиот светски правилник за заштита на цивилите, заробениците и повредените војници, Женевската конвенција се игнорира на речиси сите боишта во светот, а приврзаниците на документот апелираат на нова посветеност на меѓународното хуманитарно право.
Женевската конвенција, која е усвоена од речиси сите земји во светот откако беше финализирана на 12 август 1949 година, повторно е релевантна бидејќи вооружените групи и армии ширум светот редовно ги кршат правилата на војување.
Меѓународното хуманитарно право е под притисок, запоставено, поткопано за да се оправда насилството. Светот мора повторно да се посвети на оваа силна заштитна рамка за вооружен конфликт, онаа која ја следи премисата за заштита на животот наместо да ја оправдува смртта, изјави денеска претседателката на Меѓународниот комитет на Црвениот крст, Мирјана Шполариќ.
Конвенцијата, чии корени датираат од 19 век, има за цел да постави правила околу водењето на војната. Женевската конвенција забранува тортура и сексуално насилство, бара хуман третман на затворениците и потрага по исчезнати лица.
Црвениот крст оценува дека Женевската конвенција е многу неопходна бидејќи во светот во моментов има повеќе од 120 активни конфликти, што е шестпати повеќе отколку во 1999 година.