Јас мислам дека од неизмерни среќа и радост човек може да умре. Можеби и да се вознесе. Не верувам дека претседателката сакала да му посака на Стефан да се вознесе од среќа и радост.
Бранко Тричковски
Сакам малку да цепивлакнам над дел од честитката на Сиљановска до архиепископот Стефан и до сите верници по повод празникот Успение на Пресвета Богордица:
“Дозволете ми….Најискрено Ви посакувам празникот да го поминете, пред сè, во добро здравје, во мир и спокој, исполнети со неизмерна радост и среќа.”
Забележав неколку несмасности во честитката.
“Дозволете ми” е протоколарен вишок кој ја обременува па дури и компромитира честитката како емотивна комуникација.
Особено на ваков празник и помеѓу луѓе кои не би требало да ги разделува вакво ниво на административно фразерство.
Второ, што бара во честитката зборот “најискрено”? Зошто “најискрено”. Наместо искреноста тој збор ја потенцира пресметаноста и административноста. Трето, зошто “пред се”. Тоа скалирање на желбите е особено глупав вишок. Прочитајте ја реченицата без тој вовед и ќе видите колку ќе звучи потечно, поприродно, понепосредно, поискрено.
Четврто: зошто и било потребно на претседателката на Нашата земја да посака “неизмерна радост и среќа”. Какви се таа среќи и радости кои се неизмерни. Јас мислам дека од неизмерни среќа и радост човек може да умре. Можеби и да се вознесе. Не верувам дека претседателката сакала да му посака на Стефан да се вознесе од среќа и радост.
Петто: “мирот и спокојот” не можат да бидат “исполнети со неизмерна радост и среќа” затоа што “неизмерната радост и среќа” по дефиниција се состојба која е спротивна на спокојството и мирот.
Немав други амбиции во оваа занимавање со честитката на Сиљановска освен добронамерно да укажам на јазикот и на стилот кои се на многу ниско ниво ако во една реченица можат да се регистрираат пет несмасности. Јазикот во јавната комуникација и сериозно оштетен што значи дека секој од нас па и претседателката, мораме да обрнеме поголемо внимание на тоа што и како пишуваме и зборуваме.
Од Фејзбук ѕидот на авторот