Место да лелекаме над злата судбина неевропска, да губиме тони драгоцена општествена енергија во мољакања на бело европски параспури, предлагам да си се свртиме кон себе. Знаете ли колку работа има во секој суртук од нас?
Виолета Софкаровска
Три дена не моем да си дојдам на себе.
Пак ја утнавме работава. И западниот сосед не прешиша на посакуваниот пат кон светлата европска иднина. Си остануваме во матниов жабарник, ќе си се прпелкаме како риби на суво, ќе се глодаме меѓу себе, ќе џапаме што може да џапнеме и цврц – дошла менопаузата, андропаузата, дошло времето за пензија…
Значи, не прцаат на долго и на широко, а ние и натаму, како Пепелашка – со крпен фустан сакаме да се убутаме у дворецот, на балот!
Не, бе, благочестиви патриоти и мили чеда!
Време е да си ја кренеме главата, да се сетиме дека сме потомци на славни историски фаци, кои што умирале со последниот куршум за себе, ама си стоеле на зборот дека никогаш нема живи да му се предадат на клетиот душман…
Ние сме понежни во снагата и во умојте, немаме сабји и револвери, пушки берданки и останати оружја. И си ја цениме душичката, не ни се испушта така за безвезе.
А и никој не не држи на нишан, официјално.
Ама, сепак, можеме и ние да бидеме херои на ова, на нашево време.
Како?
Просто!
Место да лелекаме над злата судбина неевропска, да губиме тони драгоцена општествена енергија во мољакања на бело европски параспури, предлагам да си се свртиме кон себе. Знаете ли колку работа има во секој суртук од нас?
А, бе, прво метла да заигра. Да си ги изметеме овие 25 илјади квадратни километри, да го собереме ѓубрето, да направиме културни ќенефи во секој дом, да искосиме тревишта од запустените дедови ниви, да си насадиме за јадење, за пиење, да обереме, да ожнееме, да не просиме брашно од комшииве….
Е, да, да ја научиме и таблицата множење, да научиме да собираме и одземање и без дигитрон. Срамота е бе, дечки, вакви обелени у главите, да не знаеме да собираме и одземаме стотки и илјадарки.
Не ме прашувајте од каде знам. Цела вечер се опраам со возрасни персоналитети, со големи школи завршено, со дипломи, ама тешко им оди собирањето на ситни пари.
Значи, куќата се почнува од темелот, не од чатијата…
Со други зборови, забришете ги огледалцата во кои што се гледате!
Од Фејзбук ѕидот на авторката