Во меѓувреме како интермецо, пушти некој да бара химна, наша, ваша, некој не сака северна, на некој еден манаки му е малку, на друг двајца му се многу. Оваа поларизација е “ветената земја” за опстанок на крлежите.
Ана Василевска
Оваа држава од самиот почеток во поновата нејзина историја се однесува како непријател со граѓаните. Непријател, кој толку долго го измачуваш што мора да капитулира. Таков капитулиран народ е сон на секоја власт, аморфна маса која веќе не се потресува на ништо.
Правдата тука е како златна рипка што ги исполнува желбите на кримосите:
Прва желба, да не одам во затвор? –
Може. Втора желба, да ме наградат со државна фунција. -Може. И трета желба, никој да не ме памти како кримос, туку како угледен граѓанин и господин/дама? –
Може.
Во меѓувреме како интермецо, пушти некој да бара химна, наша, ваша, некој не сака северна, на некој еден манаки му е малку, на друг двајца му се многу. Оваа поларизација е “ветената земја” за опстанок на крлежите.
Утринска голгота по скопските улици низ нешто што се нарекува сообраќај, и во долгите колони возила на деца наместо за знаменитости, им ја покажуваш на пример онаа несреќна зграда во Кисела вода, која си стои како споменик за измама на продажба на станови на по сто сопственици, им го покажуваш тој урбанистички масакр во истата и во други населби, подоле некаде го вперуваш прстот кон епската кражба на граѓаните со барокниот стиропор и антиквизацијата на нешто што требаше да биде модерна метропола, и така измачен од овој визуелен атак, и звучен секако (сите пцујат и свират во кола), детето те прашува на пример, зошто не може да се префрли во друго училиште?
И му викаш, такви се правилата, не може на кој како ќе му текне да прави! Упссс, јас едноставно не можам повеќе да ги лажам, само можам да ги научам да опстанат во битката со “непријателот држава” , да не се претопат во аморфната маса, и добро да запомнат дека “Купен мир и тишина, е пострашно од војна” ( фала Вртев).
Ајде сега малку радост за покачените пензии и намалената цена на паризерот, дека Владата се грижи за нас.
Од Фејзбук ѕидот на авторката.