Претседателот на американскиот Претставнички дом Мајк Џонсон (републиканец од Луизијана), денеска е реизбран на највисоката функција во Домот уште во првото гласање.
Џонсон доби поддршка од сите, освен тројца членови на својата партија, и покрај шпекулациите дека можеби ќе му недостигаат гласови или дека ќе мора да мине низ неколку кругови гласање за да ја обезбеди функцијата. По заднинските преговори, двајца од тројцата кои првично беа против, ги променија своите гласови во негова корист.
Со тесното мнозинство на републиканците во Претставничкиот дом и со новоизбраниот претседател Доналд Трамп кој назначи тројца републикански членови за членови на својот кабинет, Џонсон можеше да си дозволи да загуби само еден глас ако сите гласаа по партиска линија. Претставникот Томас Маси (Републиканец од Кентаки) претходно најави дека нема да гласа за Џонсон.
Сепак, Џонсон ја имаше поддршката од Трамп и ја поврза својата политичка судбина со онаа на законодавната агенда на Трамп, за која републиканците се надеваат дека брзо ќе почнат да ја спроведуваат оваа година. Иако медиуми известија дека Трамп бил критичен кон Џонсон поради начинот на кој го реши привремениот буџетски договор на крајот од годината, Трамп јавно го поддржа Џонсон и тоа го направи повторно денеска.
Победата на Мајк денеска ќе биде голема победа за Републиканската партија и уште едно признание за најважни претседателски избори во 129 години, напиша Трамп на социјалните мрежи.
Републиканците сакаа да избегнат повторување на јануари 2023 година, кога, и покрај тоа што ја презедоа контролата врз Домот, им беа потребни 15 круга гласање за да го изберат тогашниот претставник Кевин Мекарти (Републиканец од Калифорнија) за претседател. Мекарти направи отстапки за да ја добие функцијата, но на крајот беше отстранет во октомври истата година.
Џонсон интензивно лобираше кај своите колеги и до доцна синоќа во обид да обезбеди победа уште во првиот круг.
Моите разговори со колегите се одвиваат одлично и многу членови со голема внимателност и добра волја се приклучија со предлози за подобрувања во процесот и работи што би сакале да ги видат поинаку, изјави тој.