НОВА дознава дека на крајот на овој месец се очекува средба помеѓу најблиските соработници на лидерите на ВМРО-ДПМНЕ и на СДСМ со европски пратеници во Брисел во Европскиот парламент (ЕП).
Според изворот на НОВА, тројца европски пратеници кои одлучија да направат обид да и помогнат на Македонија да најде излез од сегашната длабока политичка криза, решиле да им испратат покана на двете најголеми политички партии да дојдат во Брисел и тука да одржат прва рунда разговори заедно со европските парламентарци.
На овој состанок се очекува да пристигнат блиски соработници на лидерите на двете партии кои би имале мандат да ги водат на разговорите на конструктивен начин.
Познато е дека станува збор за Словакот Едвард Кукан од демохристијанската политичка група, Британецот Ричард Ховит од групата на социјалистите и Словенецот Иво Вајгл од групата на либералите.
Досега тие не добиле прецизен одговор од ВРМО-ДПМНЕ и СДСМ за оваа покана но се смета дека тоа би бил добар почеток за разговори кои треба да донесат разврска на кризата.
Портпаролката на комесарот Јоханес Хан, Маја Коцијанчич денес потсети да зборовите на комесарот Хан дека ЕК ги поддржува сите инцијативи на Европскиот парламент:
«Ги поддржуваме иницијативите на групите на европските политички партии и индивидуални членови на Европскиот парламент да се помогне да се надмине кризата и ја поздравуваме нивната подготвеност за повеќе да се ангажираат».
Таа најави дека во ЕП се подготвува група која ќе се обиде да најде терен за разбирање помеѓу најголемите политички партии во Македонија но не сакаше да даде повеќе детали, освен дека се очекува реализирање на таа иницијатива во наредните две недели.
Инаку денес ЕК потврди дека го добила барањето на Јавното обвинителство во кое се бараше Брисел да испрати експерти кои би ја набљудувале работата на обвинителите во наредниот период во решавање на случајот Пуч.
«Само потврдувам дека примивме писмо, барање од јавниот обвинител», рече Маја Коцијанчич, портпаролка на комесарот Јоханес Хан.
Таа не можеше да каже повеќе на оваа тема. Но, додаде дека македонската криза и можностите на ЕУ да помогне во нејзиното решавање е постојано на агендата на ЕК.