Она што напиша министерот на Фејсбук има право да го бара секој граѓанин на оваа држава, но не и тој. Тој, сакал-нејќел во моментов, заедно со неговиот Мицкоски е ГЛАВНАТА КАРИКА на овој СИСТЕМ и редот е така да се однесува, а не да ја ишка сопствената системска сенка и да се прави недоветен.
Јане Ѓорѓиоски
Панче Тошковски, адвокатот на Мицкоски кој ја обавува министерка функција во МВР, ни се обрати на Фејсбук како човек кој води министерство — но не на оваа, туку некоја паралелна Македонија во која ВМРО-ДПМНЕ никогаш не владееле, а тој не е дел од Системот. Тошковски, со доза „херојска саможртва“, ни соопшти дека опозицијата се здружила против него – демек затоа што правдата конечно зачукала на вратата. Никако оти чувствува некаква одговорност за трагедијата во Кочани.
Тој, имено, со тривијални популистички финти прави политички театар.
Она што напиша министерот на Фејсбук има право да го бара секој граѓанин на оваа држава, но не и тој. Тој, сакал-нејќел во моментов, заедно со неговиот Мицкоски е ГЛАВНАТА КАРИКА на овој СИСТЕМ и редот е така да се однесува, а не да ја ишка сопствената системска сенка и да се прави недоветен.
Во неговиот „огнен“ говор на Фејсбук, Панче вели дека правдата била конечно тука, и тоа благодарение на… него. Тој драги мои, замислете, се доживува како „новиот храбар борец против неказнивоста“. Заборавете на тоа што гони само бивши функционери и никако актуелни именувани од него и од сегашната влада. Ете така тој е позната по „бескомпромисна борба против криминалот и корупцијата“.
Опозициските партии се претставени како чудовишта од минатото, кои гушат со загаден воздух, производство на трагедии и чување чизми по тавани. Заборава да спомне Тошковски дека тие чизми некогаш шетаа рамо до рамо со неговото ВМРО. А некако токму во тие времиња Панче не пишуваше манифести за морална прочистеност, туку тивко ја градеше кариерата во ВМРО-ДПМНЕ како адвокат на Мицкоски. Во статусот на Фејсбук Тошковски избриша цела една декада на владеење на ВМРО-ДПМНЕ. Тоа не постои за него, Тој единаесетгодишен вмровски режим мораме да го заборавиме, убеден е Тошковски.
Панче ги напаѓа сите кои му се наоѓаат на патот како предавници на народниот гнев, бидејќи, замисли, критикуваат систем во кој ВМРО-ДПМНЕ учествува. Каква дрскост! Тој гнев сега очигледно е монопол на ВМРО-ДПМНЕ. Ексклузивното право за фрустрација го има само владејачката партија. Никако граѓаните!
Ние граѓаните и медиумите што сме за неселективна правда и што бараме одговорност од сите бивши и сегашни, сме глодари, полноглавци и лешинари како што нè нарекува и неговиот Мицкоски.
Најтажно од сè: министерот зборува како човек што доаѓа од некоја третa сила, не како министер од истата таа ВМРО-ДПМНЕ што 11 години ја шминкаше заробената држава, која ги одгледа сите тие судии од тефтерчињата во Белата палата. Тој, Тошковски, не поднесува оставка, и пострашно – не чувствува ни морална одговорност за вакви страшни трагедии кои се случуваат во негов мандат на министерување.
Но дај да не бидеме злобни. Панче нè увери дека ова не е само политичка борба, туку “битка за враќање на државата кај граѓаните”. Е сега, дали тоа значи кај истите оние граѓани кои беа следени, тепани, прислушувани и понижувани од неговите партиски пајташи, тоа не го кажа.
Сценографијата е стара, актерите се исти, а драмата – добро позната.
Борбата продолжува!
Текстот е сопственост на Фронтлајн.мк