Марин Ле Пен, претседателка на екстремно десниот Национален фронт, одлучи да го исклучи својот татко Жан-Мари од партијата каде што тој беше почесен претседател откако неговата ќерка го замени на чело на партијата.
Таа најави дека ќе се спротивстави на кандидатурата на нејзиниот татко на регионалните избори во декември годинава во регионот Прованса-Алпи-Азурна обала.
Овој чекор на ќерката кон нејзиниот татко е, според неа, многу тажен миг но таа, како одговорна за партијата, тврди дека мора да ги штити политичките интереси на Националниот фронт. Таткото и ќерката беа многу блиски соработници и таа за него велеше дека е не само татко туку и нејзин ментор и заштитник со кој секогаш се согласувала во се.
Ова, според француските медиуми, е обид на г-ѓа Ле Пен од Националниот фронт да направи нормална партија која нема да предизвикува несакани критики.
Таткото Ле Пен минатата недела уште еднаш ги повтори зборовите кои го шокираа светот пред повеќе години и според кои гасните комори од Втората светска војна се само еден “детал” на историјата. Неговиот често отворен антисемитизам, расизам, национализам и популизам, според аналитичарите, не е добар за партијата.
Во интервју дадено минатата недела за неделникот на екстремната десница Риварол, тој исто така го бранеше маршалот Петен, човекот кој беше шеф на Франција за време на нацистичката окупација од 1940-44 година и соработник со фашистичкиот режим.
“Неговиот статус на почесен претседател не му дозволува да го претвори Националниот фронт во заложник. Тоа се тешки провокации чија што цел е се чини да ми се наштети мене но кои, за жал, се голем удар за целото движење, неговите кадри, кандидатите, членовите и избирачите”, изјави г-ѓа Ле Пен.
Според нејзините блиски соработници овој прекин на односите помеѓу таткото и ќерката е тотален и дефинитвен бидејќи тие двајцата имаат несогласувања околу кои не можат да најдат согласност.
Реакцијата на Жан-Мари Ле Пен беше дека неговата ќерка треба да си го постави прашањето дали ова е корисно за целите кои таа самата си ги има поставено. Тој е убеден дека со овој чекор Марин се самоубива и себе си и партијата и има намера да се брани во органите на партијата.