Ситуацијата во Македонија се влошува а ЕУ длабоко загрижена за земјата и смета дека мора да се истражи содржината на снимките што ги објавува опозицијата.
Ова е суштината на заклучок за Македонија кој денес беше усвоен на средбата на министрите за надворешни работи на ЕУ во Луксембург.
“Советот изразува многу сериозна загриженост поради влошувањето на ситуацијата во земјата особено во владеењето на правото, фундаменталните права и слободата на медиумите кои се со срцето на демократските вредност на ЕУ и нејзината политика на проширување”, вели заклучокот на ЕУ. Тој додава дека сите овие проблеми треба да ги решат политичките лидери во интерес на граѓаните на земјата, владеењето на правото и политичката стабилност.
Советот очекува итно да се најде трајно решение и да се спроведат мерки за тоа решение. Советот бара од сите инволвирани страни да влезат во “конструктивен дијалог и да ја вратат довербата во институциите преку соодветни политички чекори”.
“Сите обвинувања треба да се истражат од страна на релевантните власти вклучително и обвинувањата за можните злоупотреби кои се објавуваат”, вели ЕУ со што бара снимките што ги објавува опозицијата да бидат истражени со почит на принципот на презумпција на невиност и независност на судските органи. Накусо, ЕУ бара да се направи истрага за содржината на снимките и да тие да не се игнорираат како да не постојат.
На крајот, ЕУ го поздравува олеснувањето на европската парламенарна “тројка” кое е во тек и од сите страни бара да покажат воздржаност и да се сконцентрираат на потрагата по решение за политичката криза што е можно побрзо.
Како што НОВА најави минатата недела, ЕУ се обврзува на оваа тема да се наврати во следните месеци. Македонија е земја кандидат па ЕУ потсетува на тоа дека секоја година Европската комисија подготвува извештај. Според дипломатите со кои НОВА разговараше, со ова ЕУ потсетува исто така дека препораката на ЕК за старт на преговори за членство може да биде одземена доколку состојбата во земјата брзо не се поправи.
Ова е прв пат ЕУ да усвојува вака сериозен заклучок за тешка политичка криза за една земја кандидат.