Зоран Иванов
Денеска премиерот Христијан Мицкоски рече и уште не одрече дека, цитирам, пожарите се подметнати.
И нешто уште многу појако рече.
Рече дека вакви подметнувања и диверзии како ова со токсичниот пожар во скопско Трубарево, ќе има и во периодот што следи, затоа што, пак цитирам, постојат центри на моќ во државата, но и надвор од неа кои не сакаат оваа Влада да успее.
Не кажа во што да не успее зашто таа еве годинаипол не успева во ништо па сега, за сопствената фрустрирачка немоќ, како да си бара вина во некакви флуидни црни центри на моќ кои не и` посакувале ништо фино на оваа негова и наша влада.
Но нејсе. Темата е изјавата на Христијан за хибридни закни од внатре и од надвор.
Нешто како познато нели? Демек домашни и странски непријатели.
А бе, амбиент комунистички ама оној од ‘48-ма.
Но серизноста настрана, ајде шегата.
По ваквите констатации на првиот човек на македонската извршна власт за напади врз државата и тоа и од внатре и од надвор, институциите треба да скокнат веднаш.
Уште ноќва. Нападната е државата.
Претседателката како врховна командантка да си емигрира од Охрид и да се вкопа на воено командниот вежбовен пункт на Криволак.
Овие девојките нејзини директорки од канцеларијата за разузнавање да и’ се нацртаат пред нозе со папките мапирани со надворешните непријателски центри, а дечково од агенцијата за домашни шпиуни да го стори истото и да ги поткаже овдешните маалски издајци крастајци.
Другите, оние посериозните надлежни за државната безбедност, да се постројат во редот за реферирање и тоа веднаш зад претходниве и да дадат заклетва за лојалноста кон Татковината.
Толку од мене. Булгаков да беше жив, овие редови од погоре ќе ги стокмеше онака поинспиративно и по профи.
Но мојот аматеризам на темава допира само до скромното граѓанско очекување за брза акција на државните безбедонсни и одбранбени институции.
За итен превентивен контраудар врз внатрешните и врз надворешните центри на моќ.
За акција врз тие кои не и` мислат добро на Христијановата влада, а за кои, без сомнение, Мицкоски има прецизни информации од неговите непартиски безбедносни служби.
Потребна е превентивна акција врз база на фактите на Мицкоски според кои Татковината е нападната и тоа и одвнатре и однадвор.
Тоа бара итност.
Многу итност. Веќе ноќва да заседава Владата, веќе утре Парламентот да прогласи вонредна спстојба, веќе задутре АРМ да е ставена во борбена готовност и веќе бар за три дена од сега државата да побара НАТО да го активира солидарниот член 5.
Да, членот 5, ами како – па за чабе ли си го сменивме името – нападната ни е државата.