И покрај врнежите од дожд, средношколците истрајно со поддршката на родители и наставници и денеска протестираше пред Министерството за образование и наука, барајќи од надлежните нивниот глас да биде слушнат.
Пораките „Доста беше молк“, „Сега ќе не слушнете“, „Нема да си одиме“ и денеска ечеа под прозорите на министерот Абдулаким Адеми. Александар Милевски, член на Средношколскиот пленум рече дека тие нема да ги бараат надлежните, туку сега чекаат повик од нивна страна, бидејќи тие протестираат веќе подолго време за доброто на образованието во земјава. Родителите на децата пак, велат се уште не им е јасно зошто е толку тешко да се разговара со млади деца.
– Утре е 25.ден од бојкотот на наставата, ќе треба да се договориме вечерва што понатаму. За денешниов собир, иако беше најавено во полицијата дека денеска ќе се собираме во 17 часот исто како и вчера, од некои неразјаснети причини, полицијата не ја блокираше улицата и можеше да дојде до несакани инциденти, некои да бидат повредени. Остануваме цврсти и доследни во она што сакаме да го постигнеме, а тоа е подобро образование за сите во Република Македонија, рече Милевски.
До денеска околу 10.000 граѓани имаат ставено свој потпис на петицијата за поддршка за средношколците, кои повеќе од еден месец ја бојкотираат формалната настава во училиштата, а веќе втора недела спијат под отворено небо во Паркот на новинарите спроти објектот на МОН.
Нивните барања се во текот на наредните 4 години да се полага стариот концепт на државна матура, а за тоа време работните групи да го усовршуваат новиот модел кој би се применил за следните генерации, предлог кој беше одбиен од Владата, која одлучи само уште годинава матурантите да полагаат по стариот концепт за матура.
Второто барање на средношколците е екстерното тестирање да биде анонимно и оценката да не фигурира никаде во свидетелствата, но Владата го одби и ова барање и децидно одговори дека преговорите престануваат.
Средношколците за утре во 17 часот најавија нови протести пред МОН.