Силното полициско обезбедување кое и денес не им дозволи на стотици демонстранти да протестираат пред Владата, намeсто гумени куршуми, доби поклон од мирните демонстранти – гумени бомбони, во чест на Денот на полицијата.
Сепак, револтирани од тоа што и денеска им беше забрането да се најдат пред Влада, активистот Славчо Димитров, алудирајќи на упадот на полицијата во читалната во „Браќа Миладиновци“ рече дека “со оглед на времето, сега е дозволено да се чита“, по што пред полицијата го прочита делот од Уставот кој гарантира дека секој има уставно право на протест.
Димитров го повика и претседателот Ѓорѓе Иванов, како прв човек во државата, да се огласи за протестите.
Тие се упатија кон Јавното обвинителство како би ги пријавиле сите кои не им дозволуваат да бидат пред зградата на Владата на Македонија. Демонстрантите и денеска бараат оставки од министерката за внатрешни работи Гордана Јанкулоска и од премиерот Никола Груевски.
Ова е втор ден демонстрантите да бидат спречени, откако вчера граѓаните кои имаа намера да протестираат пред Владата, а не им беше дозволено од полицијатата да се приближат до зградата, протестот го реализираа пред Собранието.