Средношколците кои втора недела по ред кампираат во паркот наспроти министерството за образование и цел месец ја бојкотираат наставата во училиштата, денеска одржаа уште еден протест пред вратите на МОН заедно со своите родители и наставници.
На надлежните им порачаа дека ќе бараат правна разрешница за сите закани и притисоци врз нив, ги потсетија дека бојкотот нема да го прекинат и за време на протестот една минута свртеа грб на ресорното министерство. Дел од средношколците им дадоја и цвеќиња на полицијата.
-Остануваме туак пред МОН, одиме и пред судовите. Одиме на повисоки институции да ја бараме правдата, како што рековме тужби против оние лица кои вршеа притисоци и закани. Остануваме во кампот, бојкотот на наставата продолжува, го ресетираме во понеделник , но потоа продолжуваме, за да не стигне до оние казни, изјави Александар Милевски од Среднопколскиот Пленум.
Утринава на прес-конференција пред медиумите средношколците го повикаа министерот Абдулаќим Адеми и неговиот заменик Спиро Ристовски да ги посетат учениците во Паркот на новинари спроти МОН во понеделник во 13 часот и конечно да почнат да покажат слух за нивните разбирања. Од друга страна, надлежните уште пред една недела официјално ги прекинаа преговорите со средношколците и им порачаа да се вратат во училиштата.
Досега околу 10 илјади граѓани се потпишаа на петицијата за поддршка за средношколците. Средношколците повеќе од еден месец ја бојкотираат формалната настава во училиштата, а веќе втора недела спијат под отворено небо во паркот наспроти МОН. Покрај учениците и наставници и родителите формираа Родителски пленум и одлучија целосно да застанат зад своите деца, сметајќи дека нивните аргументи се издржани.
Средношколците бараат во текот на наредните 4 години да се полага стариот концепт на државна матура, а за тоа време работните групи да го усовршуваат новиот модел кој би се применил за следните генерации. Владата го одби ваквиот предлог и одлучи само уште годинава матурантите да полагаат по стариот концепт матура.
Второто барање на средношколците е екстерното тестирање да биде анонимно и оценката да не фигурира никаде во свидетелствата, но Владата го одби и ова барање и децидно одговори дека преговорите престануваат.