Извршниот одбор на Синдикатот на македонската дипломатска служба (СМДС) донесе одлука да го поддржи протестот на социјалната коалиција Граѓани за Македонија најавен за недела 17 мај, информираат од СМДС. Тие ќе го повикаат членството да излезе на протест, а исто така, велат дека ќе се заложат и Повелбата за синдикална солидарност да даде поддршка.
На денешната седница Синдикатот одлучил да испрати интерно писмо од Министерот за надворешни работи Никола Попоски, поради, како што велат, неприфатливото однесување на амбасадорката на РМ во Хрватска Даниела Караѓозоска. Повод за писмото од министерот е обраќањето на Караѓозоска на социјалните мрежи во коешто таа ревнозно жали поради оставката на министерката Гордана Јанкулоска.
Во продолжение го објавуваме писмото коешто Синдикатот при МНР му го испраќа на министерот Попоски.
ПРЕКРШУВАЊЕ НА ВИЕНСКАТА КОНВЕНЦИЈА ЗА ДИПЛОМАТСКИ ОДНОСИ
Извршниот одбор беше известен дека амбасадорката Караѓозоска, на својот ФејсБук профил, а каде е дефинирано нејзиното својство, истапила со огромно жалење за оставката на Гордана Јанкуловска (в. во продолжение).
Имајќи го предвид принципот на функционализам од преамбуларниот параграф 4 на Виенската дипломатска конвенција, веруваме дека нашата амбасадорка во Хрватска и повеќе од очигледно го прекршила чл. 3/1-а од истата Конвенција!
Да пратела некој е-мајл или друг затворен облик на комуникација до нејзината другарка, партиска соборка или … Горде и да и’ го кажела ова истото – тоа си е приватна ствар. Ама, истапување во јавност –е рамно на кажување СТАВ НА ДРЖАВАТА!??? Тоа, автоматски значи дека сите ние (не само таа) се идентификуваме со особа за која имаме многу јасни индикации за: прекршување човекови права, злоупотреба на службена дејност, сторени (тешки) кривични дела …
Од тие причини, а имајќи предвид дека веќе имаме историја на отповикување амбасадори за впуштање во јавна, а партиска преписка, сметаме дека е неопходно нашето Министерство, во функција на заштита на професионализмот на Куќава, јавно да се огради од настапот на амбасадорката, нејзе да ја повика на консултации во Земјава, а во зависност од тоа и да се размисли за нејзино отповикување. (крај)