Зоран Иванов
Цели четири години по рамката француска уште не се најде јунак новинар да си го праша соговорникот функционер блефер и да му побара да покаже, да посочи, да нацрта, да објасни пред тв аудиториумот, пред граѓанството, каде тоа и од кого тоа ни биле загрозени националните интереси.
Па и јазикот.
И писмото.
Та и идентитетот.
Ајде журналистчишта малку машки.
Ајде прашање и ајде конечно, по четири години, на соговорниците кои ве веслаат на суво, извлечете им одговори директни, јасни, објаснувачки.
Одговори и појаснувања конкретни, а не блебетања за загрозени национален интерес и идентитет.
Прашајте да ги чуеме да ви одговорат јасно и гласно што тоа тие подразбираат под национални интереси.
И прецизно да кажат како и од кого ни се загрозени нашите национални македонски интереси.
Не им премолчувајте туку прашајте ги.
На темата ниту да ви бекнат не ќе знаат.
Ќе се препелкаат за идентитетот и за јазикот македонски.
Исто и за историјата, културата, литературата, музиката, филмот, театарот …
И за библиотеките и за музеите и за археологиите и за училиштата и за универзитетите, и за творештвата и за …
Ајде да ги видиме да ви нацртаат прецизно и да не ве маткаат со наваму, натаму бла, бла пелтечења.
Ајде по настојчиво со нив.
Нека посочуваат, нека конкретизираат и нека објаснуваат.
Ајде да им се посмееме.
Доволно долго, предолго во вашите студија ве возат со политикантските измислици за национални македонски интереси и за загрозени македонски идентитети.
Им го дозволувате тоа и по цели осум и кусур децении своја национална држава.
И по осум и кусур децении свој службен и меѓународно верификуван македонски јазик.
И по осум и кусур децении идентитетски уникатна, автономна и меѓународно афирмирана македонска култура.
И по осум и кусур децении авторизиран и институционализиран идентитет македонски.
Ајде, доволно долго им премолчувате и доволно долго молкум им климате.
Ајде по настојчиво, ајде, како за пред школска табла, барајте им одгвори разбирливи, директни и јасни.
Ќе видите, на темиве не ќе умеат ниту да ви бекнат.
Но, прво некој ќе треба да ги праша.
Има ли кој?