Европската комисија (ЕК) и тројцата европски пратеници ќе го контролираат спроведувањето на синоќа потпишаниот договор.
Тие испратија соопштение во кое велат дека спроведувањето на договорот ќе биде под ЕУ контрола.
Напредокот на примената ќе биде дискутиран во рамките на Високиот политички дијалог кој ќе одржи рунда во септември во присуство на сите партии и граѓанското општество.
“Политичките лидери сега треба брзо да го спроведат договорот со добра волја”, велат Хан, Кукан, Ховит и Вајгл кои се подготвени да работат со сите партии за да се спроведат сите препораки на Прибе.
Денешниот договор значи свежа надеж, добредојден и неопходен поттик за Македонија. Сите партии и ЕУ медијаторите заслужуваат почит за нивните напори, напиша на Твитер словачкиот министер за надворешни работи Мирослав Лајчак.
На договорот постигнат минатата ноќ испрати реакција и политичката група на либералите од Европскиот парламент (ЕП). Нивниот пратеник Иво Вајгл кој синоќа беше во Скопје, вели дека “на Македонија и се сега отворени сите шанси, како кандидат за членство во ЕУ, најпосле да може да ги започне преговорите”, вели Вајгл во име на својата политичка група. И додава дека “Македонија сега треба да тргне во спроведување на реформите кои се очекуваат од една земја која сака евро-атлантска интеграција”.
Договорот го поздравија и социјалистите од ЕП:
“Договорот предвидува календар за лидерот на владеачката партија ВМРО-ДПМНЕ Никола Груевски да даде оставка во корист на нов премиер во нова Влада во која ќе бидат вклучени неколку министри од СДСМ и заеднички договор за предвремени избори за 24 април 2016 година”, велат социјалистите чиј што претставник Ричард Ховит учествуваше на синоќешните преговори во Скопје.
Европските социјалисти очекуваат спроведување на договорот “кој ќе биде одблиску набљудуван од меѓународната заедница”.
“Најавата за Специјален обвинител кој ќе работи со полна автономија врз сомневањата за криминал и корупција, кои произлегуваат од прислушувањето, мора да биде целосно и независно применет за да се остварат европските и меѓународните очекувања дека ќе има правна одговорност за секоја злоупотреба”, инсистираат европските социјалисти.
Тие ги поздравуваат напорите на сите партии но испраќаат посебна честитка за СДСМ која “направила отстапки со потпишувањето на договорот кој е значаен чекор на доближувањето кон ЕУ”.