Лидерот на опозицијата Зоран Заев вечерва на 60. ден откако е поставен Кампот на Слободата пред Влада, во своето завршно обраќање пред камперите порача дека тоа место ќе остане симбол за слободата по која копнеат сите граѓани во Македонија.
Заев рече дека секоја наредна Влада, која ќе работи во објектот, пред кој беше поставен кампот, секогаш пред себе ќе треба да го има на ум токму тој симбол на слободата.
Тој дополни дека граѓаните кои издржале 60 дена ја постигнале целта со потписот на Никола Груевски на сопствената оставка.
Лидерот на СДСМ порача дека време е да се гради европска Македонија, која ќе биде една држава – едно општество, а не поделена Македонија, како што ја направил Груевски.
Заев ги поздрави граѓаните од сите националности, граѓански организации и активисти и рече дека токму тие се најзаслужни што копнежот за слободата во Македонија се слушнал и во САД и во Европа.
Пред да го прогласи кампот за успешен и да го затвори, Заев ги прочита имињата на неколку граѓани од различни градови низ Македонија, кои биле присутни во антивладиниот камп сите 60 дена.
За време на целиот говор, граѓаните го скандираа неговото име, а тој за возврат им порача дека сите граѓани, вклучително со симпатизерите на владејачката партија ВМРО-ДПМНЕ ќе треба да градат единствена земја, бидејќи и тие биле жртви на лагите и притисоците од врхушката која моментално е на власт.