Народниот правобранител Иџет Мемети денеска бил спречен да зборува во парламентот на седницата за ребаланс на Буџетот, дознава НОВА од извори во парламентот, а Канцеларијата на правобранителот го потврди инцидентот иако одби да го коментира. Правобранител сакал да се обрати пред пратениците бидејќи со ребалансот власта решила да скрати од буџетот на институцијата 4 милиони и 236 илјади денари од тековната 2015 година. Службите на парламентот му пристапиле пред почетокот на седницата и му рекле дека нема право на збор оти на ваков тип за седница за ребаланс не било законски да зборува пред народните избраници. Правобранителот се обидувал да објасни дека такво нешто не е според законот и дека ова не е прва седница за ребаланс на буџет на којашто тој зборувал. Им посочил да ги погледнат стенограмите од 2012 година кога тој, исто така, зборувал пред пратениците на седница на ребаланс кога на институцијата со која раководи и ги крателе средствата. Откако не успеал да се објасни, тој си заминал од парламентот. По некое време, службите оттаму почнале да му звонат и да го викаат да се врати назад бидејќи увиделе дека погрешиле и дека сепак би можел да се обрати. Народниот правобранител не се вратил, а од канцеларијата велат дека се зачудени од односот во Собранието.
– Запрепастувачки беше тоа што се случи, не може до толку да не познаваат процедурите и законите. Правобранител беше практично набркан, а отиде таму за да го одбрани својот буџет со кој им се помага на граѓаните на Македонија и да ги повика пратениците да излезат во пресрет на потребите на институцијата Народен правобранител, велат од Канцеларијата.
Средствата кои се скратени се однесуваат на плати за испразнетите работни места кои сега не би можеле да се пополнат. Оттаму велат дека институцијата Народен правобранител со години кубури со човечки ресурси, а поплаките од граѓните во однос на прекршувањето на човековите права енормно растат од година во година.