Веќе неколку месеци од меѓународната хуманитарна организација „ Лекари без граници“ се обидуваат и не можат да добијат дозвола од Министерството за здравство за да им помагаат со медицинска нега на бегалците кои доаѓаат во Македонија, дознава НОВА од извори во невладиниот сектор.
Неколку лекари подолго време престојуваат тука, но не можат да ја добијат потребната дозвола за да можат да помагаат. „Лекари без граници“ бараат дозвола за да ја преземат целокупната грижа за мигрантите на кои им е потребна медицинска помош, како што е лекување, операции и се друго што ќе им е потребно, а се тоа би било на трошок на организацијата.
Со ова ,велат нашите извори, македонската држава ќе нема трошоци во однос на лекувањето, како и ангажман од домашните лекари бидејќи тие најверојатно би склучиле договор и со некоја болница, каде што ќе можат да ги изведуваат интервенциите. Тие се познати по своите проекти во земји, во кои се водат војни и во земји во развој, кои се соочуваат со ендемски заболувања.
Во петокот на 21- ви август кога се случи инцидентот на грчко-македонската граница, во меѓузоната беа присутни само „Лекари без граници“, тие им помагаа на повредените, на децата што се задушуваа од солзавец или што се онесвестуваа. Црвениот крст и УНХЦР влегуваа само доколку полицијата ги пропуштеше, односно ги побараше. Но, внатре во Македонија не можат тоа да го прават бидејќи немаат дозвола.
Секоја година околу 3000 лекари, медицински сестри, санитарни стручњаци и други медицински и немедицински личности одат на различни задачи ширум светот. Од друга страна пак 1000 луѓе со постојано работно место, работат на ангажирање на доброволци, обезбедување финансиски средства, бараат донатори, така што располагаат со годишен буџет од 400 милиони американски долари.
Невладината организацијата „ Лекари без граници“ делува во преку 70 земји, каде пружаат примарна здравствена заштита, обавуваат оперативни зафати, го вакцинираат населението, ги обучуваат болниците и амбулантите, спроведуваат разни санитарни и прехранбени програми, го обучуваат локалното население. Во 1999 година, добиле Нобелова награда за мир, а три години порано и Награда за мир во Сеул.
Затоа, зачудува фактот што државата се уште не им дозволува да помагаат како што тоа го прават во другите држави, кога се знае дека на Македонија помошта и е повеќе од неопходна, велат активистите.
Од Министерството за здравство за НОВА потврдија дека претставници на меѓународната хуманитарна невладина организација „Лекари без граници“ доставиле до Министерството меморандум за соработка, во кој се утврдени аспектите во кои оваа организација може да придонесе за пружање медицинска помош на мигрантите на територијата на државата.
„Меморандумот за соработка е процесуиран до сите релевантни институции, со цел усогласување и допрецизирање на аспектите на соработка“ велат во Министерството за здравство.
Од таму потенцираат дека во регионот каде се лоцирани мигрантите, постојано се обезбедува потребната здравствена заштита од страна на медицински екипи од Итната медицинска помош при Здравствениот дом Гевгелија, како и екипи на Општа болница Гевгелија, а континуирано се врши и комплетна дезинфекција на просторот и транспортните средства.
Сепак, не одговорија колку време организацијата „Лекари без граници“ чекаат надлежните институции да го процесираат нивниот меморандум за соработка и зошто не се забрза процедурата, кога се знае дека се поголем број на мигранти влегуваат во државата, а Македонија се потешко се справува со проблемот.
Додека „Лекари без граници“ја нудат својата помош, активистите апелираат до граѓаните да донираат патерици и инвалидски колички за бегалците кои се инвалиди или се со повреди.
Дури бараат колички за малтер како замена на инвалидските колички.
„ Во однос на инвалидските колички, практична замена би биле и количките за малтер“, апелираат до граѓаните од невладиниот сектор.
